លោក Joleon Lescott ដែលគេនៅចំណាំបានថាជាអតីតខ្សែការពារឆ្នើមរបស់ក្លឹបមេឃខៀវ Man City និងក្រុមជម្រើសជាតិអង់គ្លេស បានលើកឡើងកោតសរសើរចំពោះសម្ថតភាពរបស់កីឡាករវ័យក្មេងសញ្ជាតិអង់គ្លេស
 
ដែលបច្ចុប្បន្នកំពុងកសាងកេរ៍ឈ្មោះក្នុងអាជីពជាកីឡាកររបស់ខ្លួនក្នុងប្រទេសអេស្ប៉ាញជាមួយក្លឹបអធិរាជស Real Madrid កីឡាករ Jude Bellingham។

ទោះបីជាយ៉ាងណាក៏ដោយលោក Joleon Lescott បាននិយាយដោយមិនញញើតមាត់ថា “ Bellingham ជា​កីឡាករ​ល្អ​បំផុត​ក្នុង​ពិភពបាល់ទាត់​ក្នុងពេល​បច្ចុប្បន្ន​នេះ ហើយគេ​កំពុង​សម្រួចសម្ថតភាព​ខ្លួន​ឯង​បាន​យ៉ាង​ល្អ Bellingham គេបានបង្ហាញខ្លួនយ៉ាងល្អឥតខ្ចុះ គាត់​យល់​ពី​ការ​ប្រកួត ក្នុង​កម្រិត​មួយ​ដែល​អាយុ​របស់​គាត់​មិន​អាច​យល់​បាន ហើយខ្ញុំហ៊ានអះអាងថាគេនិង​ឈ្នះ Ballon d’Or នា​ពេល​អនាគត វា​ក៏នឹង​ក្លាយ​ជា​រឿង​ដ៏​អស្ចារ្យ​​មួយ​សម្រាប់​ក្រុម​ជម្រើស​ជាតិ​អង់គ្លេស​ផង​ដែរ ” ។

ទោះបីជាយ៉ាងណាក៏ដោយកីឡាករវ័យក្មេង Jude Bellingham ហាក់កំពុងជោគជ័យជាខ្លាំងជាមួយក្លឹបអធិរាជស Real Madrid ស្របពេលពេលដែលស្ថិតិបច្ចុប្បន្នចាប់តាំងពីរូបគេផ្លាស់មកកាន់ទឹកដីអេស្ប៉ាញ គឺតែងតែទទួលបាននូវស្ថិតិយ៉ាងគាប់ប្រសើរជាងកាលដែលរូបគេប្រកបអាជីពជាមួយក្លឹប Borussia Dortmund ទៅទៀត ពោលគិតត្រឹមការបង្ហាញខ្លួន៨ប្រកួតក្នុងក្របខណ្ឌ Laliga រូបគេអាចរកបានរហូតដល់ទៅ៨គ្រាប់ឯណោះ។

គួរបន្ថែមផងដែលថាកីឡាករវ័យ២០ឆ្នាំ Jude Bellingham បាន​ផ្ទេរ​ពី​ក្លឹប Borussia Dortmund មកចូលរួមជាមួយនឹងក្លឹបម្ចាស់ដីSantiago Bernabeu កាល​ពី​ដើម​រដូវកាល​កន្លង​ទៅ ខណៈតម្លៃខ្លួនវិញ Real Madrid បានចំណាយរហូតដល់ទៅ ១០៣ លានអឺរ៉ូឯណោះទម្រាំយកបានគ្រាប់ពេជ្រមួយរូបនេះមករួមក្រុម៕