ថ្នាក់ដឹកនាំនៃក្រុម PSG កំពុងពិចារណាលើផែនការបណ្តេញគ្រូបង្វឹក Christophe Galtier នាពេល ដ៏ខ្លីខាងមុខនេះ។

ប្រព័ន្ធផ្សព្វផ្សាយរបស់បារាំងបានបង្ហើបថាលោក Luis Campos ដែលជានាយកផ្នែកកីឡារបស់ PSG បានពិភាក្សាជាមួយលោក Jose Mourinho ដើម្បីពិភាក្សាអំពីលទ្ធភាពដែលគ្រូបង្វឹកសញ្ជាតិព័រទុយហ្គាល់មកកាន់ទឹកដី Parc des Princes ។ Foot Mercato បានបង្ហាញថា PSG មានការរំពឹងទុកខ្ពស់ក្នុងការនាំយក "Special One " មកដឹកនាំនៅទឹកដីបារាំងនារដូវកាលក្រោយ ។

កន្លង​មក ម្ចាស់​ជើងឯក Ligue 1 ធ្លាប់​បាន​អញ្ជើញ Mourinho មក​ដឹកនាំ​ម្ដង​ហើយ​ម្ដង​ទៀត ប៉ុន្តែ​ត្រូវ​បរាជ័យ។ ទោះជាយ៉ាងណាក៏ដោយ នៅក្នុងដំណាក់កាលនេះ ថ្នាក់ដឹកនាំ PSG សង្ឃឹមថានឹងអាចបញ្ចុះបញ្ចូលគ្រូបង្វឹកដែលកំពុងដឹកនាំ AS Roma ។   L'Equipe ក៏បានបង្ហើបថា ប្រសិនបើ PSG មិនឈ្នះការប្រកួតជាមួយ Lille ក្នុង Ligue 1 ចុងសប្តាហ៍នេះ គ្រូបង្វឹក Galtier នឹងត្រូវបណ្តេញចេញ។ ដូច្នេះហើយ ថ្នាក់ដឹកនាំក្លឹបបារាំង បានចាប់ផ្តើមស្វែងរកបេក្ខជនជំនួស។  

ក្លឹប PSG ក៏បានបន្តធ្លាក់ចូលទៅក្នុងជម្លោះផ្ទៃក្នុង នៅពេលដែលកីឡាករជាច្រើនមិនពេញចិត្តនឹងការដឹកនាំរបស់គ្រូបង្វឹក ។ នេះគឺជាចំណុចខ្សោយរបស់ PSG អស់រយៈពេលជាច្រើនឆ្នាំ ប្រសិនបើ Mourinho មកដឹកនាំ PSG គាត់អាចដោះស្រាយបញ្ហានេះបាន។