ស្ថានភាពក្រុមតោខៀវ Chelsea ក្រោមការដឹកនាំពីសំណាក់គ្រូបង្វឹកថ្មីលោក​ Graham Potter កាន់តែយ៉ាប់យុឺនទៅៗហើយ បន្ទាប់ពី 9 ប្រកួតចុងក្រោយនៅ Premier League ពួកគេស្គាល់ពាក្យថាឈ្នះត្រឹមតែ 1 លើកប៉ុណ្ណោះ។  ខណៈដែលបច្ចប្បន្ននេះតោខៀវ Chelsea កំពុងតែឈរនៅលេខ 10 នៃតារាងពិន្ទុ Premier League គិតត្រឹមសប្ដាហ៍ទី 18។ 

បើនិយាយអំពីការចាយលុយទិញកីឡាករថ្មីចូលនៅរដូវកាល 2022/23 នេះ ប្រហែលជាគ្មានក្រុមណាដែលចាយលុយច្រើនជាង Chelsea នោះទេ។  ដោយគិតមកដល់ថ្ងៃទី 06 ខែ មករា នេះ Chelsea ចាយលុយសុរបអស់ 290.9 លានអឺរ៉ូហើយទៅលើការទិញកីឡាករថ្មីចូល។

ខណៈដែលក្នុងទីផ្សារដោះដូរកីឡាករនៅក្នុងខែមករានេះ Chelsea ទើបតែសម្រេចបានការចុះកិច្ចសន្យានាំយកកីឡាករថ្មី 2 រូបបន្ថែមទៀត ដោយរួមមានខ្សែប្រយុទ្ធកូតឌីវ័រកីឡាករ David Datro Fofana ពីក្រុមន័រវែស Molde FK នឹងខ្សែការពារកណ្ដាលបារាំងកីឡាករ Benoît Badiashile ពីក្រុមបារាំង AS Monaco។

ទន្ទឹមនឹងការចាយលុយទិញកីឡាករដ៏ច្រើនបែបនេះ ​Chelsea ក៏ទំនងជានឹងបើកផ្លូវអោយកីឡាករចាស់មួយចំនួននៅក្នុងក្រុម ចាកចេញទៅរកក្រុមផ្សេងលេងនៅក្នុងទីផ្សារដោះដូរកីឡាករនៅខែមករានេះផងដែរ។  កីឡាករទាំង 6 រូបខាងក្រោមនេះ ជាបេក្ខភាពឈានមុខគេដែលអាចនឹងចាកចេញពី Chelsea នៅក្នុងខែមករានេះ៖

▪️ Hakim Ziyech

Ziyech ត្រូវបានជាប់ទាក់ទងនឹងការផ្ទេរទៅកាន់ AC Milan តាំងពីរដូវក្តៅឆ្នាំមុនមកម្ល៉េះ។ ខណៈដែលអ្នកគាំទ្រជាច្រើនគិតថាទម្រង់លេងរបស់គេសាកសមនឹង Serie A ជាង Premier League។  ទោះបីជាយ៉ាងណាក៏ដោយ បន្ទាប់ពីរូបគេធ្វើបានយ៉ាងល្អក្នុងការប្រកួតបាល់ទាត់ពិភពលោកឆ្នាំ 2022 នេះ លោកគ្រូ Graham Potter ត្រូវតែគិតឱ្យបានហ្មត់ចត់អំពីការបញ្ចេញខ្សែប្រយុទ្ធស្លាបម៉ារ៉ុករូបនេះក្នុងខែមករានេះ ឬអត់នោះ។

▪️ Christian Pulisic

Pulisic មិនសូវជាបានចូលលេងច្រើននោះទេនៅរដូវកាលនេះ រួមទាំងមានបញ្ហារបួសច្រើន ហើយទម្រង់លេងក៏ធ្លាក់ចុះទៀតនោះ ខណៈដែលកាល​ពី​ខែ​ធ្នូ ​Pulisic ធ្លាប់បាន​ប្រាប់​ថា​រូបគេ​អាច​នឹង​ផ្លាស់ចេញ ដើម្បីទទួលបានឪកាសបានចូលលេងច្រើនជាងនេះ។

▪️ Édouard Mendy

ក្រឡេកទៅមើលកាលពីប៉ុន្មានខែមុន វាពិតជាគួរឱ្យភ្ញាក់ផ្អើលណាស់ ដែលមានឈ្មោះ Mendy នៅក្នុងបញ្ជីដែលអាចនឹងត្រូវបានបញ្ចេញនៅក្នុងខែមករា។  ស្របពេលដែលរូបគេមានបញ្ហារបួសច្រើន រួមទាំងការបង្ហាញទម្រង់ពុំសូវជាបានល្អ ដែលជាហេតុធ្វើអោយបាត់បង់ជម្រើសដំបូងទៅ Kepa បន្ថែមពីនេះដែល Mendy ត្រូវបានរាយការណ៍ថា AC Milan កំពុងតាមដានស្ថានភាពយ៉ាងដិតដល់បំផុត។

▪️ Carney Chukwuemeka

Chukwuemeka គឺ​ជា​តារា​វ័យ​ក្មេង​ម្នាក់​ក្នុង​ចំណោម​តារា​វ័យ​ក្មេង​ដែល​គេ​ ចាប់អារម្មណ៍ច្រើន​បំផុតនៅក្នុង​ប្រទេស​អង់គ្លេស។  ទោះជាយ៉ាងណាក៏ដោយ រូបគេមិនមានឱកាសច្រើនក្នុងការចូលលេងជាមួយ Chelsea នៅរដូវកាលនេះនោះទេ។  កីឡាករ​វ័យ 19 ឆ្នាំអង់គ្លេសដែលទើបតែផ្លាស់មកពី Aston Villa ​រូបនេះ អាច​នឹង​ត្រូវ​បានបញ្ចូនចេញ​ក្នុង​លក្ខខណ្ឌ​ខ្ចី​ជើង​នៅក្នុងខែមករានេះផងដែរ។

▪️ Cesare Casadei

ការមកដល់របស់ Casadei នៅរដូវក្តៅនេះបានបង្ហាញថា Chelsea កំពុងបង្កើតក្រុមដ៏គួរឱ្យអារម្មណ៍មួយសម្រាប់នៅថ្ងៃអនាគត។  យោងតាម ​​The Athletic តោខៀវ Chelsea ទំនងជានឹងដាក់ឱ្យកីឡាករវ័យ 19 ឆ្នាំអុីតាលីរូបនេះ ទៅក្រុមផ្សេងខ្ចីជើងក្នុងអំឡុងទីផ្សារដោះដូរកីឡាករខែមករានេះ។ 

▪️ Denis Zakaria

ក្រោយពីផ្លាស់មកចូលរួមជាមួយ Chelsea ក្នុងលក្ខខណ្ឌខ្ចីជើងពី Juventus នៅរដូវក្ដៅនេះ Zakaria ទើបតែបង្ហាញខ្លួនអោយ Chelsea បានត្រឹម 2 ប្រកួតប៉ុណ្ណោះ។  ខណៈដែល Chelsea មានពាក្យចចាមអារ៉ាមថាកំពុងពិចារណាលុបចោលកិច្ចសន្យាខ្ចីជើងខ្សែបម្រើការពារស្វីសរូបនេះមុនកាលកំណត់ផងដែរ។