ក្លឹប Al-Nasser ចាប់អារម្មណ៍ក្នុងការចុះហត្ថលេខាលើខ្សែបម្រើស្លាបសញ្ជាតិបែលហ្ស៊ិកកីឡាករ Eden Hazard របស់ក្លឹប Real Madrid នៅរដូវក្តៅនេះ  នេះបើយោងតាមកាសែត ​​Foot Mercato របស់ប្រទេសបារាំង។ថ្មីៗនេះក្លឹបនៅមជ្ឈិមបូព៌ាបានធ្វើឱ្យមានការចាប់អារម្មណ៍យ៉ាងខ្លាំងជាមួយនឹងការចុះហត្ថលេខាលើតារាឆ្នើមព័រទុយហ្គាល់កីឡាករ Cristiano Ronaldo បន្ទាប់ពីនោះពួកគេបានទាក់ទងជាមួយកីឡាករល្បីៗជាច្រើនដូចជា Sergio Ramos, Sergio Busquets និង Marcelo ។



សម្រាប់កិច្ចសន្យារបស់ Hazard ជាមួយក្លិប Real Madrid នឹងផុតកំណត់នៅរដូវក្តៅឆ្នាំ 2024  ហើយត្រូវបានផ្សារភ្ជាប់ជាមួយនឹងការលក់ចេញ  ក្រោយគាត់​មិន​អាច​បង្ហាញ​ទម្រង់​លេង​បាន​ល្អ​ដូច​ពេល​ដែល​គាត់​លេងនៅក្លិប Chelsea។



ទោះជាយ៉ាងណាក៏ដោយ ប្រសិនបើកិច្ចព្រមព្រៀងនេះជាការពិត Hazard  នឹងធ្វើការជាមួយលោក Rudi Garcia ដែលជាគ្រូបង្វឹកក្លិប Al-Nasser ម្តងទៀត បន្ទាប់ពី Garcia បានផ្តល់ឱកាសឱ្យ Hazard បង្ហាញខ្លួនជាលើកដំបូងជាមួយ Lille និងជួយអភិវឌ្ឍសមត្ថភាពរបស់គាត់មុនពេលក្លាយជាកីឡាករដ៏ល្បីល្បាញដូចសព្វថ្ងៃនេះ។



សម្រាប់ក្លិប Al-Nasser ត្រូវបានគេជឿថាមិនមានបញ្ហាក្នុងការបង់ប្រាក់ឈ្នួលរបស់ Hazard នោះទេ  ដោយពេលនេះ Al-Nasser កំពុងតែស្វែងរកការនាំយកកីឡាករល្បីៗជាច្រើនតាមដែលអាចធ្វើបាន   ក្នុង​គោល​បំណង​ជួយ​លើក​ស្ទួយ​ប្រទេស​បន្ទាប់​ពី​អារ៉ាប៊ីសាអូឌីត គិតពីការស្នើសុំធ្វើជាម្ចាស់ផ្ទះ FIFA World Cup 2030 ជាមួយអេហ្ស៊ីប និងក្រិក។